17億元朗天橋呢兩日又再熱炒返;好多人即刻走出泥,話一定係貪污。
對於呢條橋既資料我都只係由傳媒得知,所以無咩嘢可以講;但想講吓點解啲基建係「咁貴」。
1.安全/質量標準
一單基建工程,如果有安全/質量事故,傳媒當然地會指責政府;於是公務員都盡量响個標書入面指明用啲貴價好牌子,就算出事,都可以話「我已經揀左最好既料,出事錯不在我」。上次篇轉載都講過,同一粒螺絲,個價係可以差十倍,而公眾其實係睇唔到個分別的…
同理,政府亦會盡量請顧問,將責任外判俾個顧問。
再加上,原本單工程只係需要由個判頭請工人去做,但為左要更安全,於是就需要請一個「安全顧問」去監察住個判頭。
以上,全部都係錢。
2.「官商勾結」
我唔係話政府啲公務員有官商勾結,而係掉轉,公務員係最怕俾人話佢地官商勾結/疑似貪汚。
於是,為左避嫌,就算係做一單好簡單既工程,明明個公務員識做,佢都要請一個「獨立第三方」既顧問,去處理呢單工程既投標事宜,以證明佢無利益輸送;而為左監督呢個「獨立第三方」既顧問無hea做,就會再請一個「獨立監督顧問」去監督/審查「獨立第三方」既顧問既工作效率。
咁為左監察政府唔會洗多左錢,就要洗多啲錢去做監察。
3. 超支與超時
好多人批評公務工程,經常「超支」同「超時」。
假設有個公務員,佢上一單起一條橋既工程,預算五億,預計要起五年,但最尾埋單要七億,起左七年,俾人鬧到仆街。
咁到左下一次再起一條類似既橋,佢唔想俾人鬧,可以點做?
最簡單既係,做個預算既時候,寫到條橋預算要起十年,要用十億。咁到最後只係用左七年同七億… 埋單就會慳左三年又慳左三億。
***********************************************************************************
當然我以上寫既其實都係過份簡化,而實際工程係有某啲機制去盡量防止呢啲情況… 但基本上個誘因真係咁。
另外重有一點,就係,超支同超時既基建,傳媒就會大做特做… 咁準時又無超支既基建呢?
渠務署近年啲工程做得好好,連反對派都讚… 但又有幾多人會留意?
***********************************************************************************
煩氣啲都要再loop一次:
「寫呢篇唔係要為政府起基建作辯護,事實上政府啲基建規劃係有好多可以改善既地方」,但係如果只係盲目批評政府起既所有基建都係大小白象,政府做咩都係錯,咁只會落得兩個後果--
(a) 政府唔起基建,少做少錯;
(b) 政府用更保守既方法,請更多既顧問,用更多既時間,去做更多既研究,去證明啲基建唔係白象。
***********************************************************************************
有時啲嘢無話啱定錯,只係,要明白及承擔個後果。
[…] 之前講過點解啲基建咁貴。 […]